تو اَنچیں آہے ئے دل ءَ ہِکّان اِت ئے منی

تو اَنچیں آہے ئے دل ءَ ہِکّان اِت ئے منی

چمّ ءِ تہا چو کُنٹگے جِکّان اِت ئے منی

شنگینتگ اَت نَباشدیں وہد ءَ تئی بدن

بِیر آچشیں کُدوہے گْونِکّان اِت ئے منی

نا آشنائیں لبزاں زُباں ماں پتاتگ اَت

سْیہہ مارے ئے تو اہد ءَ پِلِکّان اِت ئے منی

پیوند اِتئے نہ کرزیں کٹورانی سیچّناں

اَنگار ایسپیں زہرگ ءَ تْرِکّان اِت ئے منی

ہینّاری ءَ نہ دُشتگیں دْروہاپ مِتکگ اَنت

تاں اُمر ماں اَڑان تو دْرکّان اِت ئے منی

چو گُواتے ءَ حیالاں منی آڑہور اِتئے

پادینکے ءَ چو شعراں ژلِکّان اِت ئے منی

روچ ءَ حُدا نہ مرزی ئیں ساہگ کروتکگ اَنت

دل پرچے لیبو یے پہ جنکّان اِت ئے منی