آزماں، گُلزمیں پیچیں پندان اِتاں
کِشک پادان اِتنت ، پاد تندان اِتاں
روچ بادینتگیں ساہگاں آپ کنت
چمّے گْریوان اِتاں ، چمّے کندان اِتاں
من گوں جند ءَ وتی جِنّ ءُ گَنداکواں
نپت آچیں دلءَ بِیر گْوندان اِتاں
تو وتی شپکدگ، شپچراگے کُتیں
من کہ سنگ ءِ سرا کِشک رندان اِتاں
ہَمپُسان اَت سرا مانشیں زندگی
گِس کروجان اِتاں، کبر بندان اِتاں
بے تواری ءِ مِگرازاں بُرّ اِت زُباں
چہ ہما دلوتیں گوٗسپندان اِتاں
شُونز بندان اِتنت زہر ماں کَلّیاں
اَنچشیں جاگہے، اَنچیں ہَندان اِتاں
چیر گْوچّینتہ اَہدءِ پُتنکاں وتا
گْرنچ بوجان اِتاں ، گُک بندان اِتاں
جی ہما دَور عاجز نیااَنت پدا
کیچ ءُ بالیچہ ءَ، تمپ ءُ مندان اِتاں