مُرتگیں اوستانی دْرچکے تاک جنت باریں نہ جنت
چہ من ءَ پد زیبلک مزواک جنت باریں نہ جنت
گْوانزگ ءَ کبریں، نِپِٹّیں نوبتانی بچکدگ
زھریں نُکّ ءَ کُچّلیں تریاک جنت باریں نہ جنت
سُوچنیں لبزاں زبان ءِ آبلہ تراکینتگ اَنت
گپّ اَنگر مِتکگیں گویاک جنت باریں نہ جنت
پہ منی نِزّ ءَ بلوچستان وابے دیدگاں
مات، اگاں بے وھد بیاھاں جاک جنت باریں نہ جنت
مرچیگیں سْیہ مار باندات ءَ پِلِکّان اَنت منی
باجوئیں بچّاں زمین ءِ ھاک جنت باریں نہ جنت
کس منی کبر ءَ پہ سالونکیں کپن لیلو نہ دنت
ھیسکگے بانوریں تئی پوشاک جنت باریں نہ جنت
جِکّ اِتگ آجز کسے چمّ ءَ منی چو کُنٹگے
پَند اشک ءِ سورمگیں اولاک جنت باریں نہ جنت