زند گوٛستیں بنگ ءِ تاس ءِ ساہگ ءَ
شیر کنیں زہر ءِ گلاس ءِ ساہگ ءَ
شپ منی گُرکانی بیّم ءَ روچ بنت
روچ گوٛزان اَنت تُرس ءُ تراس ءُ ساہگ ءَ
زاناں تئی دیم ءَ شپے گرانیں کپیت
تو چو روزرد ءِ ہلاس ءِ ساہگ ءَ
ھور ءُ توراں گوں تئی گنجیں گَماں
ماں شپانی چاریں پاس ءِ ساہگ ءَ
تئی دل ءُ دنیا بہ سبزاَت اَنت مدام
مُہرگ ءُ یاکوت ءُ لاس ءِ ساہگ ءَ
چمّ ہماھدّاں گوٛزات کہ کارکنت
دل درئیت کچ ءُ کساس ءِ ساہگ ءَ
ما وتی ممتازؔ بہشتے مان داشت
دوزھے ءِ روکیں آس ءِ ساہگ ءَ