ہمک پاس ءَ بہ سُتکیناں
تئی آس ءِ بہ سُتکیناں
بگندئے نور بوت دُنیا
من کوراس ءَ بہ سُتکیناں
تئی گرمیں گوٛر اَمبازاں
چو کرپاس ءَ بہ سُتکیناں
وتی جند ءِ دل ءَ گندئے
گوں وسواس ءَ بہ سُتکیناں
چہ مِہرءِ قدحاں سَرّ یچ
ہما تاس ءِ بہ سُتکیناں
ما عہد ءِ انگریں جیگ ءِ
گوٛر ءِ لاس ءَ بہ سُتکیناں
من مہرانی پلَک ترٛاشیں
گوں اَلماس ءَ بہ سُتکیناں
وتی تُرس ءَ بہ باں زندگ
وتی ترٛاس ءَ بہ سُتکیناں
عشق ءِ اوّلی گام ءِ
من چکاس ءَ بہ سُتکیناں
من ممتاز زِندگیں مرگ ءِ
جپیں آس ءَ بہ سُتکیناں