باج ءِ جنگ

دِلوں لوٹیت

کہ تئی دِید ءِ تہا زِندے بہ گوٛازیناں

گُشئے زانا

اے جمرّ بند کنت چمّاں

تسلہ دنت زمین ءَ را

تئی ہُشکاوگاں زندے بہ گوٛازیناں

بہ سبزنت

پُلک ءُ حاک ءُ گِل

سِنگانی دل ءِ تُن ءَ بہ پرٛوشاتاں

کہ دیر اِنت تُستگ ءُ سرداَنت

شگالی اَنت

بُروکیں دِل اوں ریکانی

مئے ڈیہہ ءَ

جمبر شانک دنت چمّاں

چاریت گُلزمین ءَ را

تلوسیت، جیڑیت

گروکے شہم دنت

دُور آزمان ءَ

تہ گِنداں حون ءِ ہار ءَ ملّ اِتگ اِمروز

لاشانی جوہان اِنت

سر اَنت ٹپی

دل اَنت ٹپی

گُشئے حاک ءُ گِل اَنت ٹپی

مئے عقل ءُ عاقل اَنت ٹپی

منی سنگ ءُ ڈَل اَنت ٹپی

یلیں ریکی جلیل ءَ را

ریکانی میار اِش کُت

بلے ناکو قدیر ءَ کاروانے گوں

چک ءُ بزّات ءُ گہارانی

ہچ چک ءَ نہ ترّینیت

منی سنگینیں فرزانہ

’زاکرنی‘ ذکر ءُ فکر ءَ اِنت

منی لاڑیں جنک سمی

پداں چاریت

وتی ورنا ئیں بابا ءِ

دلے اَرمانی اِنت کہ

طبیبیں ’دِینُک‘ ءِ دِین ءَ بہ سبز ینیت

ءُ اِیمان ءِ بہ کنت آباد

یلّیں حیدر

’دومُودی‘ عکسے دست ءِ اِنت

من بَردستانی زور ءِ شرّی ءَ زاناں

کہ ہؤر اِش مان ءُ ہار اِش ماں، بَلے

زمین ءَ اُورت چاریت

شانک دنت دیدوکاں آزمان ءَ

بگندیت نوک ءَ ’رمضان‘ ءِ

کہ پرائی ءَ شپ اِنت ’نوک‘ ءِ

بلے آزماں مُجاں گپتگ

ناں روچ، ماہ ءُ استالے درائی کنت

اُمیت ءُ نا اِمیتی ءِ

انچیں ساعت اَنت سکیّں

ودار ءِ گرٛاں تِریں بارے

دِلانی کو پگاں زُرتگ

شُہاز ءَ درکپان اَنت

وتی برٛات ءُ کس ءُ دوست ءُ عزیزانی، بَلے

اے آبلہ پادیں پدانی پد

پدے پیداک کننت زاناں

وہد ءَ چیرترّین اَنت

عہد ءِ سینگ ءَ نقش اَنت

زمان ءَ راکننتیں کور

زمین ءَ را کننت بانور

جنگ ءِ گال ءُ بولیاں

مستیں توکلی اَلہان کنت

ناڑی، سُریاں گوں

حَیرانی تَمن داری

رَحم علی ءَ گوں نہ بیت سگگّ

شَکلّیں جنگانی نازینکاں

جنان ءَ روت

اے جنگ اِنت

تہت ءُ تاج ءِ جنگ

راج ءِ جنگ

باج ءِ جنگ

ناعلاجانی علاج ءِ جنگ