مِہر ءِ موجریں بانور
سُوری کِلہّہ ءَ وہدے
دیم دنت کہ سوغاتاں
دل منی پدانوک کنت
دیر ءُ کوٛ ہنگیں یاتاں
من پدا رَہادگ باں
واہگ ءِ گَر ءُ چِیلّاں
زند ءِ بے سریں دود ءِ
پرٛوشاں تَیل ءُ زمزیلاں
بلکیں پہ تو پہازاں
واہگ ءِ صدف ءَ من
بوت کنت بہ باں سرپد
باز رازی گپّ ءَ من
بلکنہ اُمیت وارے
ماہ ءِ گوٛانزگ ءَ شاگیں
بیت سُتکگیں اِمروز
جنّت ءُ بہشت باگیں
درد ءِ گوٛانزگ ءَ شاگیں
شَرمنی رُدوم بوتگ
سنگ ءُ آہنیں اے دل
نرم بیت چو موم ءِ،
مارا ہم کننت ساہیل
زاناں ڈَکّمیں ملگور
کم بنت درد ءُ دور
روچ کنت درا دیم ءَ
مہر ءِ موجریں بانور
سُوری کِلّہہ ءَ وہدے
دیم دنت سوغاتاں