تو نہ دیستگ کدی عذاب غمءِ
ہچ نہ اِنت پہ تو دل حراب غمءِ
تْرانگاں جُست مہ کن کہ غم نہ کناں
چون اِنت تہرونکی شپاں واب غمءِ
ہر صباءَ زِرءِ ہوا کہ گْوزیت
بیگہاں چاڑ کنت شراب غمءِ
شادہءَ دردءِ مکتبءَ وَ کدی
در نہ برت ءُ نہ زانت کتاب غمءِ
ما تئی زلفانی شپاں گاریں گُشَے
مہرءِ منزل ءُ پیچ ءُ تاب غمءِ
من گنوکیءِ جنّتءَ چہ گْوزاں
اے گناہ اِنت کہ یا ثواب غمءِ
ما وَ نازانی تئی بیماریں
مئے علاج اِنت کہ ٹہل ءُ داب غمءِ
من وفاہانی بستگ گال پہ تو
من نہ داتگ کدی حساب غمءِ
تو خیالانی سؤتاں زُور پہ ما
ما کتگ ساز بیا رباب غمءِ
نورؔ تئی واہگانی پُل گشنت
تو نہ کِشتگ ادا گلاب غمءِ