تہرونکیءِ جہانءَ کُج اِنت ماہکانی رنگ
روچ وَ نزانت کہ چی اِنت شپ تالہانی رنگ
ہر کس گُشے کہ زانگءِ زانتءَ چہ گیش زانت
کَے کَے بہ زانت چون اِنت تئی عاشقانی رنگ
تْرانگ صدوؔءِ گیر منا بیگہاں کہ بنت
کیّاؔءَ زرتگنت گُشے مئے غمانی رنگ
گیوار تئی وفاءِ رہ اِنت منزل اِنت غمءِ
استال کلکشان شپءِ شادہانی رنگ
ہؤ زندگی ہما کہ پہ تئی واہگءَ مِرنت
پہ آہاں بدوفااَنت تئی ساہگانی رنگ
نورؔ! چہ وفاءِ دْرچکءَ کدی بے ثمر نہ بئیں
ما دیستگنت ایوکیءِ سیاہ شپانی رنگ