مئے دل ءَ جاہ بہ کن دلبر ءِ زہیر بہ نند

مئے دل ءَ جاہ بہ کن دلبر ءِ زہیر بہ نند

سہباں بیگاہ بہ کن دلبر ءِ زہیر بہ نند

تو مئے ارسانی شل ءِ، واہگ ءُ خیال ءُ غم ءِ

مئے دل ءَ راہ بہ کن دلبر ءِ زہیر بہ نند

مارا تہنائی تئی وش نہ بیت وفا ءِ شپاں

مارا ہمراہ بہ کن دلبر ءِ زہیر بہ نند

ہر کس اِنت پہ تو گنوک، ہر کس پہ تو شعر گشیت

شاعراں واہ بہ کن دلبر ءِ زہیر بہ نند

تو منی روچ ءِ اگاں سہتے بہ مارئے درداں

دیدگاں ساہ بہ کن دلبر ءِ زہیر بہ نند

تو کہ دردانی فقیر ءِ من غم ءِ منجاراں

چماں درگاہ بہ کن دلبر ءِ زہیر بہ نند