مارا درد ءِ زِہ ءِ چِہ گوٛزگ وش بیت
اَرس ءِ تِنگگ، غم ءِ ایر برگ وش بیت
گوں تئی ترٛانگاں مرچاں زیئپیں دل ءَ
چوں کُدگ، تلوسگ، زَنزرگ وش بیت
ما وتارا رسینتگ ماں ساہ کندن یے
عمر ءَ بے زندیں ساہ ءِ برگ وش بیت
آس روک اِنت دل ءِ موجریں باطن ءَ
اَرس ءَ چم ءِ تہا بُنگرگ وش بیت
روچ، روزرد، شپ ءِ نمب، مہکانی ءِ
مارا زُورگ، دَ یگ، پچگرگ وش بیت
بے تو بے چاڑ مرچاں گُلابانی پُلّ
سبزیں درٛچکاں گُشئے گیمرگ وش بیت
کبگ گرٛیونت، کپودر زَرنت، تلوسنت
پاداں اَنچیں پَدانی گِرگ وش بیت
مارا ممتاز پہ رہنیں دل ءِ موگگ ءَ
پُلگدانی تب ءِ دَر برگ وش بیت