حیالءِ ہر ٹال ءُ شاہءَ گْریتگ
کہ ما تئی گیوارءِ راہءَ گْریتگ
ترا وَ ارسانی ہچ سما نیست
فقیرےءَ داں صباءَ گْریتگ
ما زندمانءَ ابیتکیں، گردیں
مئے رُوحءَ گْریتگ مئے ساہءَ گْریتگ
او تْرانگانی اولسّءِ ہنکیں
پہ تو غمءِ بادشاہءَ گْریتگ
بہ گش! جتاہی کَےءَ نہ توریت
ثوابءِ مَرگءَ گناہءَ گْریتگ
تو پوپلءُ جیگءِ ہیراں شنگ کن
مئے واہگانی تماہءَ گْریتگ
پہ نوکیں چکّاسءَ زندگیءِ
مئے زردءِ کْوہنیں متاہءَ گْریتگ
تو دردءِ سیاہیں شپانی رازئے
غمءِ پہ تو مرچی ماہءَ گْریتگ
کہ تْرانگءِ ہار کتگ نہنگؔءَ
بہ گندے نورؔ مہ لقاہءَ گْریتگ