آبادیں دل ءِ دُنیا بِلّے کہ عذاب ءَ اِنت
تئی داتگیں ہر دردے سرٛ پتگ چوگُلاب ءَ اِنت
پہ دُوری ءِ ایرہت ءَ اے دِل من نہ رنجینتگ
مَہرنگ بَلے ہر شپ مہمان منی واب ءَ اِنت
ملگور مہ بات اَنت تئی، مئے راہ ءِ صراط ءِ پُہل
پندول چو بہشت ءَ اِنت، جِیگ بند گُشئے کعبہ اِنت
رنجین اَنت دِل ءَ ترٛانگ، تاہیر حیالے دنت
تئی ڈِیلّ منی چمروک چو زہریں شرابءَ اِنت
ہر سہت ءُ دمان کیت ءُ دریا ئیں دل ءَ بُڈّیت
تئی غم چو گُشئے پہ من گٛرانباریں گُراب ءَ اِنت
دل سرد نہ بیت اَنگت ماں برفیں زمستان ءَ
ممتاز شپاں نِشتگ اِستال حساب ءَ اِنت