راھسرے چارات ءُ پدءَ اتکاں
دلبرے چار اِتءُ پدءَ اتکاں
اِشک جنگے یا کوھنگیں لئبیے
آسرے چاراِتءُ پدءَ اتکاں
جنگ کجام نیمگءَ کنگ لوٹیت
لشکرے چاراِتءُ پدءَ اتکاں
تیرءُ توشگ من ءَ رسینگی اَت
کوہ سرے چاراِتءُ پدءَ اتکاں
چمگے، نمبگے نہ دیست پہ وت
آپسرے چاراِتءُ پدءَ اتکاں
ھون گوارایت یا آپ شنزین ایت
جمبرے چاراِتءُ پدءَ اتکاں
جنتءَ نیست ءِ دوزہ ءَ رپتاں
انگرے چاراِتءُ پدءَ اتکاں
ما پکیر، مست، مرید، دیوانگ
قلندرے چاراِتءُ پدءَ اتکاں
بچ واب اَنت یا آگہ اَنت عارف
سنگرے چاراِتءُ پدءَ اتکاں
نوں عزیز آ عزیز نہ اِنت عارف
یکبرے چاراِتءُ پدءَ اتکاں