تو گوں چمانی ارساں
دستانی ھونیں پولنگاں ششت کنئے
یاکہ مارا زھریں نگاہاں گوں چارئے
قاتل جابر گشت کنئے
من کہ کسہ بیاراں بلکیں کس منی ھمدرد نہ بیت
تئی روکیں دل سرد نہ بیت
قرآن منی دست ءَ چے کپت
آ روچی کہ گرماگی نیم روچیں جلاں
برات ءِ تیر سپتیں میّت
بے ساہ ات دیما ھیرا منی
چمّاں سیاھی آؤرت من اوشتات نہ کت
مات ءِ ہیسکارگ ڈَک ات
پیژگاہ ءُ گس روز ءِ محشر بوتاں پمن
بُن گپتاں آبادیں چمن
مرچی کہ من بیر پہ دیری ترینتگ
بدواہ تاوان بار کتگ
ھونیں دستاں پہ تو پُلّے آؤرتگ تو زھر کتگ
یک سھتے مئے روکیں جبین ءَ دست بجن
پُرس مناں چے ہینچو سال ءَ چنچو من اوپار کتگ
پہ تئی بچکنداں من جنگ ھم بھر کتگ
نو کہ نہ مُرتاں من تئی درائیں ناز ءُ ادا آں چہ دنیا ءَ رکیناں
دور براں چہ پجاروکیں ہنکیناں