میتگ ءَ زِرد ءِ دار بے وھد اِنت
سر مگر مرچی یار بے وھد اِنت
چُنّس وتی جِند ءِ باطن ءِ زھراں
ڈنّگ نہ جنت زُلپ ءِ مار بے وھد اِنت
انگہ زُلپانی توک ءَ پش کپتگ
سرگوپ ءِ چینچو کار بے وھد اِنت
داں بکن زُلپ ءِ ساھگ ءَ آرام
چو مگش بار بار بے وھد اِنت
چینچو اشتاپی بانُک ءَ گُشتہ
ھرچی چارئے بچار بے وھد اِنت
پَر تو استالے درنئیت دیر اِنت
پمّن سُہب ءِ سہار بے وھد اِنت
شیشگے لانک ءَ مان جتگ اِرشاؔد
میتگ ءِ راہ اِنت گار بے وھد اِنت