مھر پہ سوداگری یار بیلی نہ بیت
درچک بے ساھگی یار بیلی نہ بیت
وشیاں ھرکسے کیتءُ پیوست بیت
سکیّاں کس تئی یار بیلی نہ بیت
داں کہ چاگردءَ زدءُ ھسد ھاکم اَنت
دژمنی، سنگتی یار بیلی نہ بیت
نوں اے ریگزار ءَ لڈینءُ کوھے روئیں
تُنگی، گژنگی یار بیلی نہ بیت
ھرکس ءَ را وتی بس تلب دوست بیت
دل پہ ھمساھگی یار بیلی نہ بیت
توکلی توکلاں پھکءَ بے توکل اِنت
مستءُ دیوانگی یار بیلی نہ بیت
تو ھمے زندگی ءِ وڑءَ ئے عزیز
وس کتہ زندگی یار بیلی نہ بیت
نوں من واباں پہ وابانی واب گندگءَ
نوں منی آگهی یار بیلی نہ بیت
جیڑگانی تہ ءَ جیڑاتگ من وت ءَ
اُمرے گوازینت وتی یار بیلی نہ بیت
لبز، نکتہ، ھیال گوں ترا بندیاں
بے ترا شائری یار بیلی نہ بیت
مئے مھبت پہ ایمانءُ اوستیگیں دل
چلڑیں آشکی یار بیلی نہ بیت
چم برھنگ مہ بنت دل پہ پوشاک بہ بیت
لجءُ شرمندگی یار بیلی نہ بیت
تو وَ مپتءَ پہ پھرئِے گلاتگ عزیز
من وَ زانتگ تئی یار بیلی نہ بیت