پہ نمیرانیں مبارک قاضیءَ
آپ ایمانءِ بُن ھِشت اِنت،
آس اسرارے نہ بیت
تو بلوچ راجءِ کماندار
ھستی ءُ شان ءُ شرپ
روچ بندیگی نہ کت تو
شپ ھُدامرزی نہ بوت
تو کہ رپت ئے گلزمینءِ ھر ندارگ پُرس جاہ
پہ چراگءَ روچ نیست ایں
پہ شپءَ استال ءُ ماہ
جنگلءَ زیبائی نیست ایں
مُرگ کُدوھاں رپتگاںءُ
چولاں دریا یل کتگ
آپ سماک ءَ جتگ
جنگے ءَ جنگ ءَ ات ئے کہ
ھانی تئی ماتیں وتن
نوں تئی اھدءِ گمءِ کسہ دو بر وانگ کپ اِیت
ما تئی ھر گشتن ءُ شئیرانی شیدائیں مرید
ما تئی ھر لبز ءُ نکتہ ماں دل ءَ پیوستگاں
من بہ باں ارشاد بہ بیت یا کہ زبیر ءُ میر بہ باں
یاکہ علی جانؔ داد بہ بیت
یادیدگیں بسملؔ بہ بیت
کُل تئی ما مکتب ءِ دیوانگیں نودربراں
ھر کتاب ءِ ھر سبک ما ونتگ ءُ دربرتگاں
توکہ رپت ئے گُلزمینءِ ھر ندارگ پرس جاہ
کیچ ءِ ڈوک ءُ ڈل بباں یا پسنیءِ ھاکءُ ریک کُل ابیتک بے چاڑ، ملور
دردواراں گمزداں
چہ گمزداں گمزدتراں