رولہہ ءَ آزمان رھن کُتگ
جمبراں ماھیکان رھن کُتگ
پہ تئی مھروانیں بچکندے
من وتی زندمان رھن کُتگ
مرچی بّچ ءَ پہ چُنڈے تریاک ءَ
مات ءِ پاکیں گُشان رھن کُتگ
تو کہ لیکے وتارا کوم ءِ سروک
تو بلوچ ءِ گدان رھن کُتگ
کئے بزانت اے کُجام مسلمان اِنت
بدنسیب ءَ کُران رھن کُتگ
زار کہ پہ دو سِرتگیں نان ءَ
ما وتی ساہ ءُ جان رھن کُتگ
شھر ءِ کُلّیں مسیت پُرسیگ اَنت
پیش اِماماں اَذان رھن کُتگ
کازی ءَ پہ درآمدیں لبزے
جند ءِ شیریں زبان رھن کُتگ