برے من دلءَ چہ گاراں برے من وتا چہ گاراں
نوں حدا بزانت باریں من کجا کجا چہ گاراں
من وتا کدی نہ پول ات نوں کئے انت منا بہ پولیت
منی زاھر مہ چکاس من پہ دل تہا چہ گاراں
اڑے زندگی منارا ھمے ریکبار بس انت
چشیں شہر جنگلے بات کہ من جنگلءَ چہ گاراں
چشیں عیدءِ روچ پمن گشئے عید روچ مرگ انت
منءَ گوں تو ھچ گلگ نے وتی ساھگءَ چہ گاراں
منءَ نزانت ستک باور کہ نسیبءِ لاڑکی انت
برے پل منءَ نہ سیلیت برے بلبلءَ چہ گاراں
پہ گدار گندگءَ کئیت منءَ چیدگے اناشے
چو پکیرءَ در پہ در من بزاں بندرءَ چہ گاراں
منی روچ و شپ ہما انت ہما سہب و شام قاضی
ہما بے وپائیں زند انت من پدا پدءَ چہ گاراں