روچ گَردان ءَ پُشت ماں داتہ
ما چہ گیابان ءَ پُشت ماں داتہ
تئ نِگھبان ءَ پُشت ماں داتہ
وھد ءِ ایمان ءَ پُشت ماں داتہ
ما پہ امروز ءِ چارُکیں روچاں
واب گِندان ءَ پُشت ماں داتہ
جیڑگایاں، ما اَچ وتی ھلک ءَ
چِینچو ارزان ءَ پُشت ماں داتہ
وائے وائے ، شَرارتیں وھد ءَ
کَنداں کَندان ءَ پُشت ماں داتہ
لَبز گار اَنت زبان ھاموش اِنت
شِئر ءِ شیتان ءَ پُشت ماں داتہ
اے دَرانڈیھی ءَ پُلے گوں نیست
ما پہ تاوان ءَ پُشت ماں داتہ
کِشکءُراھاں اے شَھرءِ آتراپءَ
تاب ریسان ءَ پُشت ماں داتہ
اَنچو امروز ءِ روچ برکت بیت
اَنچو ارمان ءَ پُشت ماں داتہ