پاد بِلّے آبلہ اَنت دست بِلّے تْراول اَنت

پاد بِلّے آبلہ اَنت دست بِلّے تْراول اَنت

اے چے پیمیں مردم اَنت بے شاتکامی ءَ گل اَنت

تو چے پیمیں بے مثالیں درد بکشاتگ منا

چم چو استال ءَ جڑشکنت، ارس چو ہور ءَ شل اَنت

اے کپوت کہ ہر صبا نال اَنت زہیری جنگل ءَ

اے شپانکانی ہما پر بستگیں عہدی نل اَنت

رژن تالان اِنت اِشانی داں رواں قبر ءِ لب ءَ

تئی غم ءِ قندیل داں اے زندگی استیں بل اَنت

اے مروچی کہ پہ ردگوں دژمن ءَ گون کپیتگ اَنت

مئے وتی کسّ ءُ عزیز اَنت مئے وتی بیل ءُ یل اَنت

اے کجام بندیگ جاہ اِنت ہچ بشر آجو نہ اِنت

دست زمزیلاں گوں لوپ اَنت پاد تئیل ءُ سانکل اَنت

مولماں قاضیؔ منا باریں کجام جاہ ءَ رسینت

چار نیم ءَ تْرانگانی دور ءُ دراجیں جنگل اَنت