کسّے ءِ غم نہ مارگی اِنت منا
تہنا آدینک چارگی اِنت منا
چول بِلّے زِر ءِ گروناک اَنت
رامٹو بُرز دارگی اِنت منا
اے دوئیں چمّ دگہ چے زحم جناں
نود شنزان اَنت گْوارگی اِنت منا
بلکیں ابروکیں درد کمتر بنت
دل زمین ءَ لتارگی اِنت منا
گوں من تو کنٹگانی گپ جتگ
پہ تو پُلّے شہارگی اِنت منا
چورئیں چُکے ءِ یتیم ءِ سر
زِبریں دستے سمارگی اِنت منا
من اگاں بامسار ءِ استاراں
نیٹ گْوربام ءَ سارگی اِنت منا
قاضیؔ دنیا بہ بیت چو گلباگ ءَ
انچیں آشوبے آرگی اِنت منا