شیپ گِران کؤر ءِ پتار ءَ بس روان اِنت ءُ روان
زندگی گون اِنت ہار ءَ بس روان اِنت ءُ روان
واہگ ءُ مہر ءِ گنوک ءَ ہست اِنت راہ ناں منزلے
رَد دیان اِنت وت، وت ءَ را بس روان اِنت ءُ روان
’غم زَدی‘دل بڈّ ءُ بار اِنت گوں غماں’ ہجر ‘ءِ شپاں
لیڑہے چَتریں گوں بار ءَ بس روان اِنت ءُ روان
سرزمین ءَ نیست راہے کہ خُراسانؔ ءَ بہ رؤت
دل گوں کونجانی کتار ءَ بس روان اِنت ءُ روان
مہر بیت جلّ ءُ مجّل چوں دل چوں پُشت ءُ دیم بیت
عُمر اوشتیت کئی ودار ءَ بس روان اِنت ءُ روان
وہد چو بور ءَ لَگُُشتگ ، نوں منی دست ءَ شرفؔ
بے رکاب ءَ ، بے مہار ءَ بس روان اِنت ءُ روان